Një ditë pasi Pheniani organizoi një manifestim për 75 vjetorin e partisë në pushtet e për të treguar një armë të re të rëndësishme, Seuli i kujton Koresë e Veriut marrëveshjet në fuqi për të parandaluar luftimet. Zyra presidenciale e Koresë së Jugut tha të dielën se marrëveshjet ndërkoreane për të parandaluar përplasjet e armatosura me Korenë e Veriut duhet të respektohen. Udhëheqësi i Koresë së Veriut Kim Jong Un mbajti një fjalim të shtunën në 75 vjetorin e themelimit të Partisë së Punëtorëve në pushtet, duke bërë thirrje për bashkëpunim më të madh midis dy vendeve, sapo të mbarojë pandemia e koronavirusit. Por ai gjithashtu shfrytëzoi rastin për të zbuluar një armë të re masive strategjike, që vëzhguesit besojnë se është një raketë balistike ndërkontinentale (ICBM). Analistët konkluduan se ishte raketa më e madhe lëvizëse rrugore në botë, me karburant të lëngshëm. Ka shumë të ngjarë të jetë projektuar për të mbajtur koka me mbushje bërthamore në automjete të pavarura. Jeffrey Lewis i Institutit të Studimeve Ndërkombëtare të Middlebury tha se “qëllimi ishte i qartë, për të mbingarkuar sistemin e mbrojtjes raketore të SHBA-së në Alaskë”. “Jam mjaft i sigurt që Koreja e Veriut mund të shtojë koka bërthamore më shpejt sesa mund të shtojmë ne përgjues,” shkroi ai në Twitter. Analiza e Koresë së Jugut për armët e ardhshme Shtëpia blu presidenciale e Koresë së Jugut tha se mbajti një takim urgjent të Këshillit të Sigurimit Kombëtar për të diskutuar për armët dhe për përmbajtjen e fjalimit. “Ne kujtuam marrëveshje të ndryshme të bëra midis Jugut dhe Veriut për të parandaluar konfliktet e armatosura dhe luftën,” u bë e ditur në një deklaratë. Koreja e Jugut shprehu më tej shqetësim për armët dhe tha se do të kryente analiza së bashku me Shtetet e Bashkuara. Në një deklaratë të veçantë, Ministria e Bashkimit e Seulit, e cila trajton çështjet ndërkufitare, tha se fjalimi i Kimit do të çonte në paqe dhe lidhje më të mira dhe shprehu shpresat për një rifillim të dialogut për çështje të tilla si reagimi ndaj virusit dhe ndihmat humanitare.