Prokuroria e Posaçme ka cenuar lirinë e fshehtësisë së bisedave, fotove, videove dhe komunikimeve përmes sekuestrimit të telefonit të personave që ka nën hetim, apo të personave të lidhur me persona në hetim, pa një vendim gjykate. Ky është vendimi i marrë nga Gjykata Kushtetuese, që u vu në lëvizje pas një ankimimi të bërën në shkurt të vitit 2024 në lidhje me sekuestrimet e telefonave nga SPAK. Kushtetuesja thotë se veç cenimit të së drejtës së fshehtësisë së korrespondencës në rastet e sekuestrimit të telefonave shkelet edhe e drejta e mbrojtjes së të dhënave personale për pjesët që nuk lidhen me objektin e hetimit penal. Gjykata Kushtetuese urdhëron asgjësimin e të gjitha të dhënave që SPAK ka nxjerrë nga telefonat e personave nën hetim, por që nuk lidhen me objektin e hetimit penal dhe mbajtjen nën sekuestro të kopjeve të komunikimeve të të dhënave vetëm pasi këto të dhëna janë konfirmuar më parë nga gjykata si të vlefshme për hetimin.