Ashtu si shumë banorë të Moskës, Davlatmo Khadamshoyeva ka dyshimet e veta për vaksinën ruse të koronavirusit, dhe heziton ta bëjë atë. “Akoma s’e kam bërë. Nuk kam shumë besim,” thotë 23 vjecarja, e cila nuk mban maskë. “Vaksina nuk është testuar plotësisht,” thotë studentja e marrëdhënieve ndërkombëtare. Rusia e regjistroi me bujë të madhe Sputnik V, vaksinën e parë të koronavirusit në botë, që në gushtin e vitit të kaluar. E pagëzuar me emrin e satelitit të parë të lëshuar nga Bashkimi Sovjetik në vitin 1957, Sputnik është shitur me ngulm nga presidenti Putin, si vaksina më e mirë në botë, ndërkohë që edhe revista mjekësore “The lancet”, e vlerësoi si efektive në shkurt të këtij viti. Përvec Sputnik, shkencëtarët rusë kanë prodhuar edhe dy vaksina të tjera. Megjithatë, autoritetet në Moskë dhe qytete të tjera, po përballen me një mori skeptikësh të vaksinave si Khadamshoyeva. Të merkurën, presidenti Putin u bëri thirrje rusëve që t’i dyshimet mënjanë dhe të vaksinohen, duke thënë se vaksnat ruse janë “më të besueshmet dhe më të sigurtat” në botë. “Gjëja më e rëndësishme është shëndeti. Kijeni parasysh!” tha presidenti 68 vjecar. Rusët përmendin disa arsye për të mos bërë vaksinën, që nga bindja se do t’u injektohet një mikrocip, e deri te frika e mutacioneve gjenetike. Por sipas sociologëve, hezitimi për vaksinën është shenjë e pakënaqësisë popullore dhe provë e mungesës së besimit tek autoritetet pas dekadash të tëra propagande nga ana e Kremlinit. Nga një sondazh doli se 62 % e rusëve nuk duan ta bëjnë vaksinën, ndërsa 56 % s’kanë frikë nga koronavirusi.