Polonia do të fillojë këtë muaj zbatimin e një programi të ri për stërvitje ushtarake, si pjesë e një plani më të gjerë për të stërvitur rreth 400.000 njerëz në vitin 2026, njoftoi të enjten Ministria e Mbrojtjes. E nxitur prej pushtimit të Ukrainës nga Rusia, Polonia tani shpenzon për mbrojtjen më shumë se çdo anëtar tjetër i NATO-s në raport me produktin e brendshëm bruto. Ajo tani ka ushtrinë e tretë më të madhe në aleancë, me një personel prej 216,000 trupash, dhe synon ta rrisë edhe më shumë ushtrinë në dekadën e ardhshme. Programi “Në Gatishmëri” do të jetë vullnetar dhe i hapur për të gjithë qytetarët, nga nxënësit e shkollave, tek të rriturit e punësuar, kompanitë dhe të moshuarit. Ministri i Mbrojtjes, Ëladyslaë Kosiniak-Kamysz, e ka cilësuar këtë program si “stërvitja më e madhe mbrojtëse në historinë polake”. Programi do të ofrojë kurs bazik për sigurinë, stërvitje për mbijetesë, udhëzime mjekësore etj. “Vetëm në nëntor dhe dhjetor ne do të trajnojmë rreth 20.000 njerëz në trajnime individuale, por numri i përgjithshëm, për të gjitha format e trajnimit, është rreth 100.000 njerëz”, tha në një konferencë për shtyp zëvendësministri i mbrojtjes. Ministria synon të stërvisë vitin e ardhshëm afërsisht 400.000 njerëz “individualisht, në grupe, si pjesë e programit ‘Edukimi me Ushtrinë’, në trajnimin e rezervës dhe në shërbimin ushtarak të detyrueshëm dhe vullnetar”, shtoi ai. Shefi i Shtabit të Përgjithshëm të Polonisë, tha se programi ka dy synime kryesore; të forcojë qëndrueshmërinë e qytetarëve dhe komuniteteve, dhe të rrisë disponueshmërinë, gatishmërinë dhe kapacitetin e rezervave. Programi u bë publik për herë të parë nga kryeministri Donald Tusk në mars për të “ndërtuar një ushtri rezervistësh” mes shqetësimeve të shtuara të sigurisë pas pushtimit të Ukrainës nga Rusia.