Kina ka vënë në shërbim aeroplanmbajtësen e saj të fundit pas testimeve të gjata në det, raportuan mediat shtetërore të premten, duke shtuar në flotën e saj një anije që ekspertët thonë se do të ndihmojë atë që është tashmë marina më e madhe në botë të zgjerojë fuqinë e saj përtej ujërave të veta. Agjencia zyrtare e lajmeve Xinhua tha se Fujian ishte vënë në shërbim të mërkurën në një bazë detare në ishullin Hainan të Kinës jugore në një ceremoni të ndjekur nga udhëheqësi i lartë Xi Jinping. Fujian është aeroplanmbajtësja e tretë e Kinës dhe e para që ajo e projektoi dhe e ndërtoi vetë. Është ndoshta shembulli më i dukshëm deri më tani i riorganizimit dhe zgjerimit masiv ushtarak të Xi Jinping që synon të ketë një forcë të modernizuar deri në vitin 2035, dhe një forcë të "klasit botëror" deri në mesin e shekullit, që do të ishte e aftë për t'u përballur me Shtetet e Bashkuara të amerikës. Me këtë, Pekini hedh një hap tjetër drejt mbylljes së hendekut me Marinën Amerikane, flotën e saj të aeroplanmbajtësve dhe rrjetin e bazave që i lejojnë asaj të mbajë një prani në të gjithë botën.