Policia Rrugore e Tiranës ka zhvilluar një aksion tre ditor monitorimi në të gjitha akset rrugore të kryeqytetit, me fokus në parandalimin e parkimeve të gabuara në trotuare, korsitë e taksive dhe autobusëve, respektimin e rregullave të qarkullimit rrugor nga drejtuesit e monopatinave dhe motomjeteve, sidomos përdorimin e kaskës mbrojtëse. Si rezultat i kontrolleve 19 automjete të parkuara gabim janë tërhequr me mjet ngritës, kanë vendosur masa administrative ndaj shtetasve që lëviznin me monopatina në kundërshtim me rregullat, 1 shtetas u arrestua, pasi u kap me doza lënde narkotike kanabis në automjet, 1 shtetas tjetër u ndalua, pasi lëvizte pa rrip sigurimi dhe rezultoi me masë sigurie “Arrest në shtëpi” si dhe 11 drejtues automjetesh janë arrestuar ose proceduar për shkelje të ndryshme të kodit rrugor. Policia Rrugore apelon për respektimin e rregullave të qarkullimit rrugor, sidomos ndalimin e parkimeve të paligjshme në hapësirat e dedikuara për transportin publik si dhe përdorimin e detyrueshëm të kaskës mbrojtëse për drejtuesit e motomjeteve dhe monopatinave.