Lejet e reja të ndërtimit shënuan rritje të fort në tremujorin e dytë të këtij viti, edhe pse te të dhënat e raportuara nga INSTAT mungonin disa bashki dhe nuk pasqyrohen lejet e dhëna nga Këshillil Kombëtar i Territorit. Sipas raportimit paraprak të INSTAT, lejet e reja për ndërtim u rritën me gati 31 për qind në periudhën prill, maj, qershor krahasuar me të njëjtën periudhë të vitit të kaluar. Sipas INSTAT, gjatë periudhës prill-qershor 2026 janë miratuar 460 leje ndërtimi për ndërtesa të reja, nga 352 leje në të njëjtën periudhë të vitit të kaluar. Edhe sipërfaqja e parashikuar për ndërtimet e reja është zgjeruar. Në tremujorin e dytë ajo arriti në 307 mijë metra katrorë, nga 278 mijë metra katrorë të tremujorit të dytë të vitit të kaluar. Rënia e vetme lidhet me vlerën e projekteve të miratuara, që është rreth 2.4 miliardë lekë më e ulët se sa lejet e miratuara në prill-qershor të 2025. Pjesa më e madhe e lejeve të dhëna gjatë tremujorit të dytë lidhet me ndërtimet për banim. INSTAT raporton 331 leje për ndërtesa rezidente, me një sipërfaqe të përgjithshme prej 183 mijë metra katrorë.