Në aleancën perëndimore ekziston një besim në rritje mbi trajektoren e luftës në Ukrainë. Ky besim është i justifikuar, por potencialisht i rrezikshëm. Aleatët perëndimorë kanë treguar një unitet të pashembullt në kundërpërgjigjen e tyre, me sanksionet e vendosura ndaj Rusisë, dhe me ndihmën e madhe ushtarake që kanë dhënë për Ukrainën. Optimizmi i madh në Uashington dhe në pjesë të Evropës, u reflektua qartazi në deklaratën kontroverse të Joe Biden se udhëheqësi rus Vladimir Putin “nuk mund të qëndrojë më në pushtet”. Supozohet gjerësisht se presidenti amerikan ka folur në mënyrë të pamenduar, dhe se këshilltarët e tij u detyruan ta përgënjeshtronin deklaratën me shpejtësi. Por komentet e tij pasqyrojnë ndjenjën që dominon aktualisht në Uashington, për ndryshimin e regjimit në Rusi. Në fakt, pozita e brendshme dhe ajo ndërkombëtare e Putinit, duket shumë me e lëkundur se përpara pushtimit. Por nga ana tjetër realiteti më pak i diskutuar, është se lufta paraqet ndërkohë edhe rreziqe politike të mëdha dhe në rritje për qeveritë në Perëndim. Ekziston ende rreziku që Rusia ta vazhdojë luftën për shumë muaj, me një numër në rritje të vdekjeve dhe shkatërrimit të infrastrukturës.