Reshjet intensive të shiut që kanë përfshirë pjesën juglindore të Shqipërisë kanë shkaktuar rrëshqitje masive dherash në aksin rrugor Gramsh–Korçë, duke e bërë këtë segment të pakalueshëm për disa orë. Në fshatin Bratilë dheu dhe gurët kanë bllokuar njërin krah të rrugës, duke krijuar dhe rrezik për drejtuesit e mjeteve. Automjetet janë detyruar të lëvizin me kujdes të shtuar për më shumë se gjashtë orë, ndërsa mungesa e sinjalistikës dhe ndërhyrjes emergjente ka krijuar rrezikun për aksidente. Pamjet nga vendngjarja tregojnë rrugë të bllokuara nga dheu, gurët dhe degët e pemëve, ndërsa mjete të pastrimit nuk janë parë në terren, duke ngjallur pakënaqësi te banorët lokalë. Banorët e Bratilës kërkojnë ndërhyrje të menjëhershme për pastrimin e rrugës dhe masa afatgjata për të shmangur përsëritjen e ngjarjeve të tilla. Ndërkohë, meteorologët paralajmërojnë për reshje të vazhdueshme, gjë që mund të përkeqësojë më tej situatën në orët në vijim. Drejtuesit e mjeteve këshillohen të shmangin qarkullimin në këtë aks ose të tregojnë kujdes maksimal, sidomos gjatë natës.