Në zonën e paskuqanit, po vijon puna për rindërtimin e kopshtit “Lidhja e Prizrenit”, i shembur një vit më parë pas termetit të 26 nëntorit. Mbi ndërtesën e rrënuar po ngrihet nga themelet objketi i ri 5 herë më i madh në sipërfaqe. Kryeministri Edi Rama ishte në Kamëz për të parë nga afër ecurinë e punimeve, të cilat parashikohet të përfundojnë në gjysmën e dytë të dhjetorit. Kreu i bashkisë së kamzës Rapip Suli tha se puna vijon prej 4 muajsh dhe së shpejti do të jetë gati. Duke përgëzuar për punën cilësore të realizuar nga kompania ndërtuese, kryeministri Rama u shpreh edhe lidhur me elementë të veçantë të projektit. Më pas kreu i qverisë u ndal në shkollën “Jashar Hoxha”, ku po vijon puna për ndërtimin e saj. Kryebashkiaku Suli tha se shkolla e re do t’u ofrojë 1050 nxënësve të saj, përveç ambienteve mësimore të cilësisë së lartë, klasa dhe laboratorë, edhe terrene sportive të jashtme, çka u ka munguar deri më tani. Inspektimi në lagjen e vjetër me pallate silikat në Kamëz ishte ndalesa e fundit e kreut të qeverisë në këtë zonë. Pallatet e kësaj lagje po sistemohen, si dhe infrastruktura lidhëse është duke u rikualifikuar për t’i dhënë një cilësi jete më të mirë banorëve të saj. “Ky investim i vjen në shërbim rreth 7000 banorëve”, - tha kryebashkiaku Suli, i cili shtoi se këtu nuk ishte vënë dorë që nga vitet ’90-të. Gjithashtu, infrastruktura nëntokësore është duke u sistemuar me kanalizimin e ujërave të zeza, si dhe rrjetin e furnizimit me ujë të pijshëm, për të garantuar furnizim me ujë në çdo moment të ditës. Projekti i urbanizmit për këtë lagje pritet të rrisë vlerën e apartamenteve. “Të gjitha janë bërë me sistemin kapot. Deri pak kohësh këtu kanë qenë ferra dhe mbeturina. Është bërë sistemimi i fasadave, rikualifikimi urban, janë planifikuar parkime mes pallateve, lulishte të vogla, si dhe një treg që do t’i shërbej lagjes. Çdo apartament këtu sot kushton më shtrenjtë. Minimumi është rritur vlera e apartamenteve 20-30 %” Kryeministri Rama vlerësoi punën e bërë në këtë bashki me sistemimin urban që po i bëhet jo vetëm kësaj lagjeje, por gjithë bashkisë në tërësi.