SpaceX ka realizuar me sukses një testim të raketës së tij të gjeneratës më të re Starship, duke përmbysur një trend dështimesh zhgënjyese. Raketa më e madhe dhe më e fuqishme në botë u nis nga Teksasi menjëherë pas orës 18:30 sipas orës lokale për një fluturim 60-minutësh, të mahnitshëm. Agjencia hapësinore amerikane NASA planifikon të përdorë Starship për të dërguar njerëz në Hënë për programin e saj Artemis në vitin 2027. "Punë e shkëlqyer nga ekipi i SpaceX!!", shkroi CEO i SpaceX, Elon Musk, në X. Ai e mirëpriti suksesin pasi tre lançime të Starship përfunduan në dështime këtë vit, dhe një raketë shpërtheu në platformën e lançimit në qershor. Starship është raketa më e madhe dhe më e fuqishme e ndërtuar deri më sot. Ajo përbëhet nga një raketë shtytëse e quajtur Super Heavy dhe anija kozmike Starship. Shenjat ishin pozitive që nga fillimi i testimit të së martës. Të 33 motorët e raketës shtytëse u ndezën dhe pas rreth shtatë minutash, ajo u nda nga anija kozmike dhe ra në Gjirin e Meksikës. Starship vazhdoi të ngjitej, duke arritur një lartësi maksimale prej gati 200 km mbi Tokë, përpara se të niste të rrotullohej rreth planetit. SpaceX tha se kishte ndërmend ta vinte raketën nën presion për të testuar limitet e saj. Kompania e ka projektuar Starship që një ditë të jetë një sistem transporti plotësisht i ripërdorshëm, i aftë për të transportuar njerëz në Hënë dhe Mars. Versioni i parë i raketës pati pesë nisje të suksesshme, por të gjitha përpjekjet për të lëshuar versionin më të ri patën përfunduar në shpërthime spektakolare. Musk dëshiron që Starship të certifikohet për udhëtime me ekuipazh që vitin e ardhshëm, dhe gjithashtu ka sugjeruar se do të fillojë fluturime pa ekuipazh në Mars në 12 muajt e ardhshëm.