Dosja e 21 janarit nuk ka pasur fundin e duhur lidhur me veprimet proceduriale, akuzat, të pandehurit, ndëshkimet ligjore e më tej dënimet e autorëve. Për këtë arsye, 10 vjet pas krimit të rëndë të vrasjes së 4 të pafajshmëve në Bulevardin Dëshmorët e Kombit në Tiranë, dosja është rihapur dhe Policia e Tiranës kërkon rifillimin e hetimeve për 21 janarin. Policia dorëzoi në prokurori letër kërkesën, ku i kërkohet prokurorisë një riinspektim hetimor për këtë cështje, bazuar në disa të dhëna të tjera dhe ligjërisht për cdo dosje që ka elementë të provave të reja, agjencitë e hetimit vihen në lëvizje. Ekspertët e hetimit kanë arritur në përfundimin se duhet një riinspektim për caktimin e drejtimit të qitjes në momentin e vrasjes së Hekuran Dedës dhe Aleks Nikës, si dhe plagosjen e Fatos Mahmutajt, Sokrat Godes, Erald Boshas, Artes Dybelit, Ilia Qeskos dhe Ilia Papas. Kërkohet të kryhet riekspertim i predhës së gjetur në trupin e Aleks Nikës. Policia kërkon gjithashtu të ripyeten personat që kanë dijeni kryesisht ish-efektivë dhe efektivë të gardës që ishte në shërbim në datën 21 janar. Gjithashtu në letërkërkesë kërkohet të ripyeten të afëmr të viktimave dhe dëshmitarë. Një tjetër kërkesë ka të bëjë me rikqyrjen e e pamjeve filmike të fokusuar kryesisht tek Ziver Veizi, Aleks Nika, Hekuran Deda dhe të plagosurit.