Prokuroria e Tiranës ka përfunduar hetimet dhe ka dërguar në gjyq ish-presidentin e Urdhrit të Stomatologut Nikoll Deda dhe zëvendësen e tij Aurela Guri. Sipas Prokurorisë, Nikoll Deda, I vënë në pranga më 15 qershor 2025, ka vepruar në kundërshtim me ligjin duke rritur buxhetin e ‘Urdhrit të Stomatologut’ nga viti në vit për përfitime personale. Në cilësinë e Presidentit të Urdhërit të Stomatologut, Deda ka kryer nepotizëm duke lejuar punësimin e njerëzve pa kriter, familjarë të tij, me qëllim manipulimin e vendimmarrjeve të Këshillit Kombëtar nga viti 2016. Ai akuzohet se ka shpërdoruar fondet e Urdhërit të Stomatologut, si dhe ka tjetërsuar fonde në forma biletash apo pagesash fiktive në favor të familjarëve të tij apo të të tretëve. Ish-presidenti akuzohet për veprat penale ‘Vjedhje e kryer duke shpërdoruar detyrën’, ‘Shpërdorim detyre’ dhe ‘Veprime në kundërshtim me vendimin e gjykatës’.