Prokuroria e Tiranës përfundoi hetimet dhe dërgoi në gjyq dosjen kundër ish-Presidentit të Urdhrit të Stomatologut, Nikoll Deda, dhe zv/Presidentes për abuzime me fondet e Urdhrit. Hetimet e Prokurorisë së Tiranës konkluduan se Nikoll Deda, kur ishte President i Urdhrit të Stomatologëve, duke shfrytëzuar postin, ka tjetërsuar fonde të Urdhrit të Stomatologut duke blerë bileta si dhe ka bërë pagesa fiktive për familjarë të tij dhe persona të tjerë të afërt. Po ashtu ai punësoi familjarë të tij pranë institucionit që drejtonte me qëllim manipulimin e vendimmarrjeve të Këshillit Kombëtar nga viti 2016. Nga ana tjetër zv.presidentja akuzohet se ka shkelur ligjin duke marrë vendime financiare për buxhetin e vitit 2024 të Urdhrit të Stomatologut, duke mos pasur asnjë atribut. Ndaj të dyve prokuroria ka ngritur akuza për tre vepra penale ato të vjedhjes duke shpërdoruar detyrën, shpërdorim detyre dhe veprime në kundërshtim me vendimin e gjykatës.