Qyteti i Fierit mbrëmjen e kësaj të marte është blinduar e rrethuar nga policia. Burimet policore bëjnë me dije se ky është një kontroll i zakonshëm, që ka si qëllim kontrollet e automjeteve të cilat konstatohen si të dyshimta, apo të atyre automjetve të cilat janë luksoze dhe me targa të huaja. Në terren kanë zbritur grupe të shumta kontrolli duke filluar nga strukturat e Hetimit në drejtorinë e Policisë Fier, oficerë e agjentë të krimeve në Komisariatin e Policisë Fier si dhe patrulla të përgjithshme, të cilat kanë ngritur postblloqe në pikat hyrëse dhe dalëse të qytetit të Fierit. Automjetet luksoze e ato me targa të huaja janë ato që ndalohen më tepër, ndërsa vihen re edhe kontrolle automjetesh e kontrolle trupore të drejtuesve të tyre e pasagjerëve. Burime të sigurta pranë policisë së Fierit kanë bëre me dije se në fakt fokusi është tek kapja e personave në kërkim, atyre që mund të kenë armë zjarri apo atyre që tentojnë të shpërndajnë lëndë narkotike.