Kryetari i Partisë Socialiste, Edi Rama i rikthehet turit me diasporën. Këtë të enjte Rama udhëton drejt Shteteve të Bashkuara të Amerikës, ku ka rezervuar më 26 tetor një takim me emigrantët shqiptarë që jetojnë dhe punojnë në New York. Prej disa ditësh në Shtetet e Bashkuara të Amerikës ndodhet drejtuesi politik i diasporës, Taulant Balla, i cili është takuar me studentë dhe profesorë shqiptarë në universitetin e Havardit në Boston si dhe me kryebashkiaken shqiptare në New Jersey, Violeta Berisha. Talentet shqiptare në shkencë dhe politikë, të cilët kanë zgjedhur të largohen drejt Shteteve të Bashkuara të Amerikës, do të mund të votojnë në zgjedhjet e vitit 2025, prandaj fokusi i të gjitha palëve politike, është më shumë se kurrë tek diaspora dhe tek potenciali në shifra që vota e tyre ka për të ndryshuar balancat politike. Pas New York-ut, stacioni i radhës i kryetarit të Partisë Socialiste, Edi Rama në turin e tij me emigrantët, do të jetë Greqia. Më 3 nëntor, Rama udhëton drejt Selanikut ku në orën 11 në një ambjent privat do të takohet me diasporën shqiptare.