Kryeministri Edi Rama ka reaguar lidhur me aksionin e nisur për çlirimin e hapësirave publike, ku krahas paralajmërimeve, qetëson një pjesë të bizneseve, të cilat nuk kanë zaptuar të gjithë trotuarin, por një pjesë të tij, duke u kujdesur që mos të cenohet liria e këmbësorëve për të patur qasje të drejtë në të. Në një postim në rrjetet sociale, kryeministri shkruan se nuk ka probleme për karriget dhe shërbimin në një pjesë të trotuarit, se një gjë e tillë ndodh edhe në kryeqytetet si Parisi e Londra. “Asnjë problem me karriget dhe shërbimin në një pjesë të trotuarit, si në Paris, Londër apo New York, por pa harruar që trotuari është i njerëzve dhe kurrësesi i barrikadave, si në Lungomare! Koha për të çliruar trotuaret nga barrikadat dhe për ta ngritur edhe shërbimin edhe dukjen në një nivel të ri, të denjë për Shqipërinë Turistike”, shkruan Rama.