Forcat e Armatosura të Shqipërisë do të kenë pjesë të tyre një nga sistemet më të mira raketore antitank “Javelin”. Lajmi u konfirmua nga Ministri i Mbrojtjes Niko Peleshi, ndërsa pak ditë më parë ishte kompania amerikane Lockheed Martin që tha se Shqipëria, Norvegjia, Letonia e Tajlanda janë pjesë e një porosie të këtyre raketave. Nga Pogradeci, ministri sqaroi për gazetarët se kjo është në kuadrin e modernizimit të Forcave të Armatosura. Veç këtij sistemi, sipas Ministrit të Mbrojtjes, do të ketë edhe blerje të tjera apo donacione nga partneri strategjik i Shqipërisë, SHBA apo nga partnerë të tjerë në NATO. I pyetur në lidhje me kërkesën për anëtarësim të Suedisë dhe Finlandës në NATO, ku Shqipëria është vend anëtar, Ministri i Mbrojtjes tha se vendi ynë do të përkrahë linjën e Aleancës.