Autoritetet turke njoftuan se gjatë ditës së tretë të protestave, 343 persona u arrestuan në mbarë vendin. Protestat shpërthyen pas arrestimit të Ekrem Imamoglu, kryetarit të bashkisë së Stambollit, i cili u ndalua të mërkurën me akuzat për korrupsion dhe mbështetje të grupeve terroriste, disa ditë para se të shpallej si kandidat për zgjedhjet presidenciale të vitit 2028. Në një fjalim së fundmi Presidenti Rexhep Tajip Erdogan e dënoi protestën dhe theksoi se qeveria e tij nuk do të pranojë "vandalizmin" ose "terrorin e rrugës". Ai shtoi se nuk do të lejojnë prishjen e rendit publik. Imamoglu, i cili është pjesë e Partisë Republikane Popullore po hetohet nga autoritetet turke dhe pritet të paraqitet në gjykatë. Protestat vazhduan, ndërsa mijëra demonstrues u mblodhën në Stamboll. Policia përdori gaz lotsjellës për të shpërndarë turmën, ndërsa përleshje të tjera u raportuan edhe në Izmir. Imamoglu është një nga më shumë se 100 individë, përfshirë politikanë, gazetarë dhe biznesmenë, të cilët janë arrestuar si pjesë e hetimeve të vazhdueshme.