Për të tretën herë gjatë këtij muaji, para Parlamentit të Malit të Zi u mbajt një protestë me sloganin “Ne ekzistojmë”. Me mijëra qytetarë malazezë kërkuan tërheqjen e amendamenteve të Ligjit për presidentin, zhbllokimin e Gjykatës Kushtetuese si dhe mbajtjen e zgjedhjeve të parakohshme parlamentare. Protestuesit kënduan himnin kombëtar të Malit të Zi, mbajtën në duar flamuj të Shteteve të Bashkuara dhe Bashkimit Evropian dhe mbajtën pankarta me mesazhe si “Për Malin e Zi, për BE-në”, “Nacionalizmi është i shfrenuar dhe aty bie Kushtetuta”, “Nuk do t’i bëjmë gati valixhet” e të tjera.