Teksa përsëriti kërkesën që ata t`i dorëzohen autoriteteve në Kosovë, kryeministri në detyrë Albin Kurti deklaroi se të akuzuarit për sulmin në Banjskë gjenden shumë afër presidentit të Serbisë, Aleksandar Vuçic, madje, sipas tij, më afër sesa mbrojtja e vet. Kurti i bëri këto komente pas publikimit në rrjetet sociale të disa pamjeve dhe fotove ku shiheshin disa persona para ndërtesës së Presidencës së Serbisë, gjatë protestës së së shtunës, për të cilët pretendohet se janë të akuzuar për ngjarjen e Banjskës. Ai deklaroi se kjo dëshmon qartë që ekzekutivi i tij pati të drejtë kur i shpalli organizata terroriste “Mbrojtjen Civile” dhe “Brigadën e Veriut” . Kurti insistoi se imazhet nga ndërtesa e Presidencës serbe, tregojnë se sulmi i vitit 2023 u krye nga një grup “kriminal e terrorist” që ishte “i dirigjuar, e financuar nga Beogradi” dhe, sic theksoi ai, nuk bëhet fjalë aspak për një grup huliganësh. “Janë njerëz të cilët janë stërvitur në Serbi, i marrin urdhrat prej andej dhe kanë kryer agresion në Kosovë. Ata duhet t’i dorëzohen Kosovës. Kjo tregon se ne kemi pasur të drejtë dhe flet vetë për regjimin e Beogradit, i cili në njërën anë vepron kësisoj për shkak se i mohon krimet e kryera gjatë luftës në Kosovë, e në anën tjetër vetëm sa e rrit bashkëpunimin me Kremlinin dhe me presidentin despotik, Vladimir Putin”, ishte komenti i Kurtit.