Njësia Operacionale e Drejtorisë së Policisë Rrugore, gjatë fundjavës ka vijuar kontrollet me radar në rrugën interurbane Krrabë-Elbasan-Krrabë, për të parandaluar shpejtësinë tej normave të lejuara, e cila është rrezik potencial për aksidente rrugore. Gjatë fundjavës, si rezultat i kontrolleve në të dyja kahet e lëvizjes, janë konstatuar shpejtësi tej normave të lejuara, që varionin nga 135 km/h deri në 213 km/h në orë, dhe madje në kulmin e trafikut. Nga Njësia Operacionale e Policisë Rrugore gjatë fundjavës është marrë vendim për heqjen e 35 lejeve të drejtimit për shpejtësi mbi dyfishin e normës së lejuar, janë vendosur 59 masa administrative për shpejtësi dhe manovra në rrugë, si dhe 2 masa maksimale me vlerë 30 mijë lekë të rinj, pasi drejtuesit e mjeteve ishin shtetas të huaj. Po gjatë kontrolleve janë vendosur 29 masa për përdorim të celularit gjatë drejtimit të mjetit, 8 masa për mosvendosje të maskës për pasagjerët në automjet që nuk kanë qenë pjesëtarë të familjes, 33 masa për parakalime të gabuara dhe 9 masa për mosvendosje të rripit të sigurimit. Policia lëshon apelin e fortë se në rrugë nuk duhet të fluturosh, por të respektosh rregullat e qarkullimit rrugor. Sipas policisë më e pakta e mosrespektimit të shpejtësisë të çon te polici dhe radari dhe në destinacion do shkoni pa patentë. Ndërsa në rastin më të keq aksidenti mund t’ju marrë edhe jetën, sepse shpejtësia vret.