Në vijim të operacionit policor "Perimetri", policia ka goditur një tjetër rast të dhënies ndihmë shtetasve të huaj për kalim të paligjshëm të kufirit, kundrejt shpërblimit. Një 36 vjeçar dhe një 23 vjeçar nga Pogradeci janë arrestuar nga policia pasi janë kapur duke transportuar 7 emigrantë të paligjshëm. Dy pogradecarët janë kapur nga shërbimet e Policisë në aksin rrugor Pogradec-Qafë Thanë, pranë fshatit Hudënisht, duke transportuar shtatë emigrantë të paligjshëm në drejtim të Tiranës, me mjetin fuoristradë tip "Benz", të cilin e drejtonte 36 vjeçari. Në momentin kur Policia po ushtronte kontroll, një prej të rinjve ka tentuar të largohet, por menjëherë është kapur dhe ndaluar. Tashmë dy të arrestuarit përballen me akuzat për veprat penale "Ndihma për kalim të paligjshëm të kufijve" kryer në bashkëpunim dhe "Mosbindja ndaj urdhrit të punonjësit të policisë së rendit publik".