Është shoqeruar në Polici Elidon Çela, pronari I një linje autobuzash që bëjnë transport mallrash Itali-Shqipëri. Çela u shoqerua në ambientet e Policisë së Vlorës, për kontrabandë ilaçesh, shishe me shampanjë Don Perinjon dhe pesticide. Kjo është hera e dytë që Çela ndalohet pasi pak muaj më parë atij iu gjetën 500 mijë € të fshehura në një autobus të linjës Bari-Durrës. Eurot ishin fshehur në tavanin e mjetit. Çela, i cili rezulton pronar i agjencisë ‘Buon Aventura’, u lirua nga burgu në fund të dhjetorit të kaluar, teksa gjykata e Apelit në Durrës vendosi detyrim paraqitje. Gjyqtarja arsyetoi vendimin me pretendimin se lirimi nga dhoma e paraburgimit nuk e pengon zhvillimin e hetimeve ndaj tij. Në dëshminë e dhënë në polici pak ditë pas arrestimit, Çela deklaroi para uniformave blu se shuma monetare e zbuluar janë kursime të familjes së tij, për të cilat ishte I gatshëm të vinte në dispozicion të gjitha faturat.