Katër policë të Kosovës, me detyrë në stacionin policor në Mitrovicën e Veriut, janë pezulluar nga puna. Policët e pezulluar me vendim të drejtorit të policisë, dyshohen për keqpërdorim të detyrës zyrtare. Pezullimi i zyrtarëve policorë, sipas Policisë së Kosovës, vjen si rezultat i pamjeve të publikuara në disa portale dhe rrjete sociale, të cilat tregojnë pamjet se si zyrtarë policorë në uniformë, gjatë kryerjes së detyrës zyrtare, kalojnë kohën në një lokal bastesh. Veç pezullimit të përkohshëm, stacioni policor i Mitrovicës Veriore, ka filluar procedurën për hetimin e shkeljeve të supozuara ndërsa “procedurat tjera të hetimeve të brendshme disiplinore do të udhëhiqen nga hetuesit policorë të Drejtorisë së Standardeve Profesionale”.