56 të arrestuar, mes tyre 16 të mitur të moshave 15deri 17 vjeç, si dhe 97 të tjerë të proceduar penalisht, është bilanci i Policisë për protestën e studentëve, në ditën e tretë radhazi të zhvilluar më 15 tetor. Sipas njoftimit zyrtar të Policisë, gjatë tubimit, disa pjesëmarrës kanë ushtruar akte dhune, duke hedhur gurë, sende të forta dhe lëndë piroteknike në drejtim të punonjësve të Policisë dhe godinave të institucioneve shtetërore. Më tej në njoftim, thuhet se protestuesit kanë shkatërruar dhe dëmtuar biznese, banka, sinjalistikë rrugore, godina institucionesh shtetërore dhe prona të tjera publike e private, si dhe kanë djegur automjete të Policisë. Në njoftim thuhet se gjatë këtyre akteve të dhunshme, janë kundërshtuar dhe goditur me sende të forta punonjësit e Policisë së Shtetit, gjatë ushtrimit të detyrës. Policia thotë se si pasojë e akteve të dhunës, janë dëmtuar 24 punonjës të Policisë, të cilët kanë marrë ndihmën mjekësore. Në njoftim thuhet se vijojnë veprimet hetimore për dokumentimin e plotë të ngjarjeve, identifikimin e personave të tjerë të përfshirë dhe vënien e tyre përpara përgjegjësisë ligjore. Sakaq, materialet procedurale iu referuan Prokurorisë, për veprime të mëtejshme.