Ministrja e Bujqësisë dhe Zhvillimit Rural, Frida Krifca, përmes një postimi të bërë në facebook ka bërë me dije situatën aktuale ne vend për shkak të përkeqësimit të motit. Të hënën qarku më i rrezikuar nga reshjet e dendura të shiut, ishte Dibra, ndërsa këtë të martë Krifca bën me dije se situata atje është stabilizuar dhe nuk paraqitet si problem. Sa I përket gjendjes në të tre hidrovorët e Drejtorisë së Ujitjes dhe Kullimit në Durrës, Krifca thotë se paraqitet e mirë dhe pompat janë në punë me kapacitet të plotë. Niveli i ujit ka pësuar tërheqje. Në Fier, situata e niveleve të ujit në lumenj po shkon drejt përmirësimit. Vazhdon ulja e niveleve të ujit në lumenjtë Vjosa, Shkumbin, Seman, Pavlla, Kalasa, Drinos dhe Shushica, niveli i cilëve ka pothuaj 24 orë që është brenda shtratit. Gjendja elektro-mekanike ne hidrovorët Terbuf, Karavasta, Divjakë, Povelçe, Seman, Akerni, Orikum, Çukë e Butrint është në gatishmëri të plotë. Në qarkun e Korçës situata vijon pa reshje, me temperatura të ulëta nën 0 gradë. Fusha e Maliqit pa asnjë pasqyrë uji deri në këto momente. Hidrovori Tushemisht, aktualisht nuk po punon, pasi niveli i ujit është në minimum. Në qarkun Berat, janë ndalur reshjet që prej mesditës. Hidrovori Konisbaltës nuk është në punë, pasi kuotat janë në minimum dhe nuk paraqitet asnjë problematikë. Në qarkun e Elbasanit që prej mesditës vijon pa reshje. Niveli i Shkumbinit në hidrometri tregon një rënie me 50 cm nga piku i djeshëm. Krifca në fund shprehet se situata është e më e qetë dhe joproblematike.