Pas reagimit të kryeministrit Rama sa i takon vendimit të greqisë për të dekretuar zgjerimin me 12 milje në detin Jon, ka ardhur edhe reagimi i Partisë Demokratike. Përmes një njoftimi për shtyp PD ka shprehur shqetësimin lidhur me mungesën e transparencës së qeverisë ndaj zhvillimeve të fundit sa i përket Dekretimit të zgjerimit të Ujërave Territoriale Greke. Selia blu ka ngritur një sërë pyetjesh që lidhen me këtë çështje, duke kërkuar përgjigje nga ana e qeverisë. “Përse qeveria shqiptare nuk ka bërë asnjë transparencë në lidhje me negociatat për ndarjen e kufijve ujorë me Greqinë, megjithëse negociatat për këtë qëllim kanë rifilluar që më 2013? A është diskutuar ndonjëherë në këto negociata ideja që qeveria greke t’i shtrinte ujërat e veta territoriale nga 6 ne 12 milje? Nëse po cili ka qenë qëndrimi i qeverisë shqiptare në këtë pikë? A e vendos Shqipërinë kjo shtrirje nga pala greke e detit territorial në 12 milje, në një pozitë më pak të favorshme negociuese? Nëse ky zgjerim e vendos Shqipërinë në një pozitë më pak të favorshme, a duhet që qeveria shqiptare të paraqesë rezervat e saj lidhur me këtë zgjerim si dhe me aspekte të tjera që përkeqësojnë pozitat e Shqipërisë”, thuhet ne pyetjet që ngre publikisht Partia Demokratike. Selia blu deklaron se mbetet e angazhuar sa i takon respektimit të së drejtës detare ndërkombëtare, Konventës së OKB mbi të Drejtën e Detit të Montego Bay të vitit 1982, të respektimit të të drejtave të të gjitha palëve dhe mbrojtjes së të drejtave të Shqipërisë në përfitimin e të gjitha atyre hapësirave detare që me të drejtën ndërkombëtare i përkasin. “Partia Demokratike i bën thirrje qeverisë, të bëjë transparencë të plotë mbi çdo veprim apo mosveprim të saj në dëm të interesave të vendit, dhe garanton çdo qytetar shqiptar se nesër në pushtet do të luftojë me forcën e ligjit, në respektim të Vendimit të Gjykatës Kushtetuese, me ekspertizën më të mirë kombëtare e ndërkombëtare, për të mbrojtur interesat legjitime të Shqipërisë”, përfundon deklarata e PD.