Miliona banorë të Floridës ishin ende pa energji elektrike të premten, si pasojë e uraganit Milton që përshkoi këtë shtet, duke shkaktuar tornado dhe vdekjen e të paktën 16 vetëve, raporton Zëri i Amerikës. Për të rikthyer energjinë dhe shërbimin celular punonjësit e shërbimeve vijuan punën në terren, ndërsa pjesa tjetër e ekuipazheve u angazhua për të pastruar pemët e rrëzuara në rrugë si dhe lagjet e prekura nga përmbytjet si pasojë e shirave të dendur të uraganit Milton. Operacioni i spastrimit mund të zgjasë javë ose muaj, edhe pse uragani nuk goditi qa fort sa çishte paralajmëruar. Uragani i pestë më intensiv i Atlantikut në histori, Milton mund t’u kushtojë kompanive të sigurimit midis 30 dhe 60 miliardë dollarë, tha të premten Marcos Alvarez, analisti i firmës Morningstar DBRS që merret me vlerësime financiare. Por kjo shumë është gjithsesi shumë më e ulët nga parashikimi që ishte bërë në fillim të javës, para mbërritjes së stuhisë, për 100 miliardë dollarë dëme.