Pas shtatë vjet negociatash, Zvicra hoqi dorë nga një marrëveshje kornizë e planifikuar me BE për marrëdhëniet dypalëshe, pavarësisht kërcënimeve të Brukselit për tregtinë, duke thënë se kërkesa e bllokut për të lejuar lirinë e lëvizjes është një cmim i lartë për tu paguar. Nuk ka pasur pajtim për pika vendimtare, tha Presidenti zviceran Guy Parmelin. Sidoqoftë, Zvicra do të mbetet një partner i besueshëm i Bashkimit Evropian, siguroi Ministri i Jashtëm. Ai pret që marrëveshjet e tanishme bilaterale të vazhdojnë të zbatohen dhe që të vazhdojnë diskutime për marrëveshje të reja. Për më tepër, ekziston dëshira që në një "dialog politik" me BE bashkëpunimi të zhvillohet edhe më tej. Sidoqoftë Zvicra do të vazhdojë të angazhohet për kontributin në mbështetje të anëtarëve të rinj të bllokut. Bëhet fjalë për 1.3 miliardë franga zvicerane ose1.2 miliardë euro. Përveç kësaj, Zvicra dëshiron të bëjë në mënyrë të njëanshme përshtatje në ligjet për BE në fusha të caktuara, në mënyrë që të shmangë pengesat tregtare. Me dhënien fund të negociatave, Zvicra vë në provë marrëdhënien e saj tradicionalisht të ngushtë me BE. Zvicra nuk është anëtare e BE, por është e përfshirë në shumë projekte evropiane përmes marrëveshjeve bilaterale. Ajo ka gjithashtu akses në tregun e brendshëm të BE dhe në kthim lejon lëvizjen e lirë të njerëzve. Tregtia me BE përbën 60 përqind të prodhimit të brendshëm bruto të Zvicrës, pasuar nga SHBA me pak më pak se dymbëdhjetë përqind. Anasjelltas, Zvicra është partneri i katërt më i madh tregtar i BE pas SHBA-së, Kinës dhe Britanisë së Madhe.