Drejtori i Zonave të Mbrojtura në Lezhë, Pjetër Toni dhe tre inspektorë të këtij institucioni janë ndaluar nga policia. Ndalimi i tyre vjen pas një hetimi disa mujor nga policia dhe prokuroria, për hedhjen e inerteve në mënyrë të paligjshme dhe tjetërsimin e pronave në zonën e mbrojtur të lagunës së Kune Vainit. Ndaj tyre është vendosur masa e sigurisë “arrest me burg” nga gjykata e Lezhës, me kërkesë të Prokurorisë Sipas burimeve, Policia ka ekzekutuar vendimet e gjykatës këtë të premte. Në fakt, skandali për këtë ccështje u bë publik nga gazetarët e emisionit investigativ Fiks Fare në Top Channel, në muajin janar të vitit 2020. Parku natyror Kune Vain, u shndërrua në një kantier të madh ndërtimi, pasi këtë zonë të mbrojtur e kishin marrë përsipër individë privatë, duke hedhur inerte dhe duke mbushur kanalet që furnizonin me ujë Lagunën, duke dëmtuar kështu ekosisteme. Emisioni investigativ Fiks Fare, denoncoi pikërisht këtë skandal, ku në pamjet filmike të asaj kohe, dukeshin inertet e hedhura në brendësi të parkut, pranë bregdetit.