Shqipëria është në prag të zgjedhjeve të radhës vendore me palët mosbesuese ndaj njëra-tjetrës dhe paragjykime për procesin. Por nga burojnë këto paragjykime? Një analizë e Open Data me të dhënat e Ministrisë së Drejtësisë arrin në përfundimin se përgjithësisht, krimi zgjedhor në vendin tonë mbetet i pandëshkuar. Në Analizë janë marrë tetë procese zgjedhore, duke nisur që nga viti 2005. Në total, sipas statistikave zyrtare të gjyqësorit të siguruara nga Open Data Albania, janë proceduar për kundërvajtje penale me sfond elektoral 133 dosje, me 268 persona të dënuar. Bazuar te parashikimet e Kodit Zgjedhor janë ndërmarrë në total vetëm 75 procedime me 83 të dënuar. Vepra penale, e cila është konsumuar më shumë gjatë proceseve zgjedhore në vitet 2005-2021, është Falsifikimi i dokumenteve dhe i rezultateve të zgjedhjeve. Kjo vepër penale përkon me nenin 326 të Kodit Penal . Në vitet në shqyrtim, për këtë nen janë shënuar 30 procedime gjyqësore dhe 90 të dënuar.