Shifrat e infektimeve bien ndërsa ato të vaksinimeve po rriten në BE. Sigurisht, pandemia nuk ka përfunduar, por sinjalet janë pozitive. Shumica e vendeve të BE tani kanë filluar kthimin e ngadaltë në jetën normale, po hapin dyqanet, restorantet, teatrot, hotelet etj. Gjithcka, sidoqoftë, me rregulla shumë të ndryshme për testimin, kohën e hapjes e kufizimet e lëvizjes apo detyrimin për maskën. Sipas të dhënave të Autoritetit të BE për Mbrojtjen nga Pandemitë, ECDC treguesi për infektimet me koronavirus në shumë vende të BE qëndron nga 60-120. Vetëm në Francë, vendet baltike apo Suedi kjo shifër është dy herë më e lartë. Britania e Madhe, Finlanda apo Portugalia si edhe disa ishuj kanë vlera që lëvizin nga 30 deri në 60 infektime në javë për 100.000 banorë. Nuk ka një procedurë të njësuar në BE, se si të veprohet me pandeminë, por një vlerësim të përbashkët. "Shpejtësia e vaksinimit është shtuar në të gjithë Europën, dhe kjo duhet të mbetet kështu. Së bashku me një gjendje më të mirë epidemiologjike, kjo na lejon që të hapim sërish shoqëritë tona. Megjithatë duhet të mbetemi të kujdesshëm", thuhet në një deklaratë të përbashkët të 27 vendeve anëtare të BE. Në fund të samitit të BE, të mbajtur të martën në Brukel, krerët e shteteve dhe qeverive thanë po ashtu se përpjekjet për koordinim për certifikatën dixhitale të kovidit do të vijojnë deri në verë. Me këtë certifikatë, nga 1 korriku do të mundësohet udhëtimi pa detyrime karantine apo formularë hyrjeje për të vaksinuarit, të shëruarit dhe të sapotestuarit. Ndërkohë që do të rishihen edhe një herë rekomandimet për udhëtimin brenda BE deri në mes të qershorit.