Diplomatët më të lartë nga administrata e Presidentit Biden dhe nga Rusia në takimin e tyre të parë të mërkurën theksuan se ish-vendet armike të Luftës së Ftohtë kanë dallime serioze në mënyrën se si i shikojnë çështjet botërore, por folën me një ton optimist për bisedimet, duke thënë se të dyja palët gjithsesi mund të gjejnë mënyra për të punuar së bashku. Sekretari i Shtetit i Shteteve të Bashkuara Antony Blinken, në takimin e tij të parë me Ministrin e Jashtëm rus Sergei Lavrov, tha se nuk ishte "sekret që kemi mosmarrëveshjet tona" dhe se Uashingtoni do t'u përgjigjej akteve agresive nga Rusia, por se bota do të jetë më e sigurt nëse udhëheqësit e të dy vendeve punojnë së bashku. Edhe Lavrov, tha se Rusia dhe Shtetet e Bashkuara kanë "dallime serioze" por duhet të bashkëpunojnë "në sfera ku interesat tona afrohen". Blinken tha se Presidenti Biden dëshironte "një marrëdhënie të parashikueshme, të qëndrueshme me Rusinë" dhe tha se të dy vendet mund të punojnë së bashku për të luftuar pandeminë e koronavirusit, për të luftuar ndryshimin e klimës, duke u marrë me programet bërthamore të Iranit dhe Koresë së Veriut dhe luftën në Afganistan. "Ne mendojmë se kjo është mirë për njerëzit tanë, e mirë për popullin rus dhe me të vërtetë e mirë për botën", tha Sekretari Blinken. Takimi i parë i nivelit të lartë personalisht mes zyrtarëve të administratës së Presidentit Biden dhe një homologu rus, zgjati një orë e 45 minuta, më shumë se takimi një orësh që pritej. Marrëdhëniet SHBA-Rusi kanë qenë të tensionuara që nga marsi kur Presidenti Biden tha se ai e konsideronte Putinin si një "vrasës", duke bërë që Moska të tërheqë për konsultime ambasadorin e saj në SHBA. I dërguari ende nuk është rikthyer.