Një operacion i gjerë ndërkombëtar antidroge është zhvilluar në disa shtete njëkohësisht përfshirë edhe vendin tonë. Përmes një njoftimi zyrtar Policia e Shtetit ka bërë të ditur se gjatë këtij operacioni të koduar “Tibus në Vlorë janë vënë në pranga mëngjesin e së martës 5 shtetas shqiptar të cilët janë arrestuar me qëllim ekstradimin drejt Italisë, Eriseld Nelaj, Albano Jazaj, Dionis Maskaj, Zigur Aliaj, Rezart Elmazaj. Arrestimi i tyre është bërë pasi ishin shpallur në kërkim ndërkombëtar nga Interpol Roma, Itali, pasi Gjykata e Romësi kishte lëshuar urdhër-arrestin për këta shtetas, për kryerjen e veprës penale “Organizatë kriminale me qëllim trafikun e narkotikëve”. Sipas policisë këta shtetas, në bashkëpunim me pjesëtarët e tjerë të organizatës kriminale, dyshohen se në harkun kohor qershor 2018 deri në janar të 2019, kanë qenë të angazhuar në këtë grupim kriminal, me qëllim trafikimin e lëndëve narkotike nga Shqipëria në drejtim të Italisë dhe vendeve të tjera të Evropës.