Shtetet e Bashkuara të amerikës janë stërvitur për mbrojtjen e Kanalit të Panamasë gjatë manovrave të përbashkëta me vendin e Amerikës Qendrore, mes shqetësimeve për praninë në rritje të Kinës në rajon. Stërvitja, me emrin e koduar PANAMAX-Alpha Phase I dhe e planifikuar nga 13 deri më 18 korrik, ishte projektuar për të "forcuar përgatitjet për kërcënimet ndaj sigurisë së Kanalit të Panamasë dhe infrastrukturës tjetër strategjike", sipas Shërbimit Kombëtar Aeronautik të Panamasë. Sekretari amerikan i Mbrojtjes, Pete Hegseth, ka paralajmëruar më herët për praninë dhe ndikimin ushtarak dhe ekonomik në zgjerim të Kinës në Hemisferën Perëndimore, një rajon i parë prej kohësh si oborri i SHBA-së, i cili përfshin Amerikën Qendrore, Amerikën e Jugut dhe Karaibet. Paralajmërimi i shefit të Pentagonit vjen pas pretendimit të Presidentit Donald Trump, se Kina "operon" Kanalin e Panamasë, një rrugë ujore jetësore për tregtinë globale. Kanali, të cilin e ndërtoi SHBA-ja, lidh oqeanet Atlantik dhe Paqësor dhe ka qenë nën kontrollin e Panamasë që nga viti 1999. Duke u përballur me presionin e administratës Trump, CK Hutchison me seli në Hong Kong ra dakord në mars t’ia shiste aksionet e saj në portet e Panamasë një konsorciumi të udhëhequr nga amerikanët. Trump më vonë shpalli fitoren mbi blerjen prej 23 miliardë dollarësh.