Njësia Policore me emrin Operacioni Forca e Ligjit prej afro një viti ka vënë në shënjestër shumë personazhe të krimit, disa për krime që kanë prodhuar pasuri, e disa për krime, që janë kryer për hakmarrje, e që nuk janë shoqëruar me potencial ekonomik. Në fakt, ligji parashikon që formularët për deklarimin e pasurive u dërgohen të gjithë atyre personave që kanë kryer një krim të rëndë, qoftë kjo edhe vrasje për motive hakmarrje, në gjendje të dehur, apo brenda familjes. Gjithsesi, nuk bëjnë përjashtim në ligj as mafiozët e huaj, që ndoshta e kanë shlyer dënimin në vendin e tyre dhe strehohen përkohësisht në Shqipëri. Në nenin 5 pika 3 të ligjit të miratuar nga Parlamenti thuhet se subjekte të këtij akti normativ janë edhe personat fizikë dhe juridikë, shtetas shqiptarë apo të huaj, si dhe persona pa shtetësi, për të cilët ka filluar procedura e shpalljes, apo për të cilët ekzistojnë dyshime të bazuara në elemente të faktit për përfshirje në çdo krim apo formë të terrorizmit dhe të financimit të tij, të kryera brenda ose jashtë territorit të Republikës së Shqipërisë, sipas parashikimit të legjislacionit në fuqi, për masat kundër financimit të krimit e terrorizmit”. Burimet e Policisë konfirmuan se rastet janë shumë, ku personave të huaj, por me banim të përkohshëm apo të përhershëm në Shqipëri u është dërguar formulari për deklarimin e pasurisë, me të njëjtin afat si shqiptarët e dyshuar; atë të 48 orëve. Ka pasur raste, kur formularët kanë mbërritur për llogari të tyre nga përfaqësuesit ligjorë - duke shtuar, se për ta hetimet do të kryhen më gjerësisht, përmes informacioneve shtesë edhe nga strukturat ligjzbatuese të vendeve të tyre të origjinës. Të paktën në 5 raste, autoritetet shqiptare kanë bërë arrestime apo sekuestrime për llogari të kolegëve italianë, duke goditur anëtarë të Sacra Corona Unitas dhe "Ndranghetas" dhe bllokuar pasuri të tyre, të investuara në Shqipëri.