Organizata Botërore e Shëndetësisë thotë se përmirësimi i situatës së pandemisë mbetet ende ne nivel të “brishtë”, dhe bëri thirrje që të shmangen udhëtimet ndërkombëtare. “Të përballur me një kërcënim të vazhdueshëm, dhe pasiguri, ne duhet të tregojmë kujdes”, tha drejtori i OBSH-së për Evropën, Hans Kluge. “I ashtuquajturi variant indian i koronavirusit të ri, i cili mund të jetë më i transmetueshëm, tani është identifikuar në të paktën 26 nga 53 vendet në rajonin evropian”, tha Kluge gjatë konferencës së tij javore për shtyp. Por, ai tha se vaksinat e autorizuara janë efektive kundër llojit të ri. Sipas seksionit të OBSH-së, që mbulon Evropën dhe një pjesë të Azisë Qendrore, numri javor i rasteve të reja është ulur me 60 për qind për një muaj. Megjithatë, varianti indian i koronavirusit është duke u studiuar ende. “Ai është në gjendje të përhapet me shpejtësi", tha Kluge. Sipas OBSH, variantet e reja "nuk janë në vetvete të rrezikshme, por ato mund të bëhen nëse ndryshojnë sjelljen e virusit.” Drejtori Kluge tha se “Deri më tani vetëm 23 për qind e njerëzve në rajonin evropian kanë marrë një dozë vaksine, dhe vetëm 11 për qind janë injektuar me dy doza. Vaksinat mund të jenë një dritë në fund të tunelit, por ne nuk duhet të verbohemi nga kjo dritë", tha ai.