OBSH ka njoftuar se që sot e tutje, do të përdorë shkronjat e alfabetit grek për t’iu referuar varianteve të Covid-19 të zbuluara për herë të parë në vende si Britania e Madhe, Afrika e Jugut apo India. Për shembull, varianti anglez do të quhet Alpha, varianti jugafrikan Beta, dhe ai indian Delta. OBSH tha se kjo bëhet për të thjeshtuar diskutimet, por edhe për të shmangur stigmatizimin që po u bëhej vendeve, emrat e të cilave po përdoreshin. Më herët gjatë muajit maj, qeveria indiane e kritikoi emërtimin e variantit B.1.617.2, të zbuluar tetorin e vitit të kaluar, si “varianti indian”, edhe pse OBSH nuk e kishte quajtur kurrë zyrtarisht me këtë emër. “Asnjë shtet nuk duhet të stigmatizohet kur zbulon dhe raporton ndonjë variant të Covid-19,” tha në tëitter drejtoresha teknike e OBSH, Maria Van Kerkhove. Ajo bëri gjithashtu thirrje për monitorim të rreptë të varianteve, dhe për shpërndarjen e të dhënave shkencore, me qëllim ndaljen e përhapjes së pandemisë. Një listë e plotë e emërtimeve të reja u publikua në faqen zyrtare të OBSH. Megjithatë, shkronjat greke nuk do të zevendësojnë emërtimin shkencor të varianteve. Nëse zbulohen më shumë se 24 variante, nuk do të mjaftonin shkronjat e alfabetit grek, kështu që do të njoftohej një sistem i ri emërtimi, tha zyrtarja e OBSH.