Ministria për Evropën dhe punët e Jashtme ka kujtuar një vjetrin e sulmit në Banjskë ku mbeti I vrarë rreshteri i policisë së Kosovës, Afrim Bunjaku. Përmes një reagimi në platformën X, kreu I diplomacisë Igli Hasani e ka cilësuar të papranueshme faktin që autorët e këtij krimi mbeten ende të lirë. "Duke kujtuar me nderim,sakrificën e Afrim Bunjakut, Shqipëria mbështet Kosovën në përpjekjet dhe arritjet e saj, për vendosjen e sundimit të ligjit në të gjithë territorin e vendit. Është e papranueshme që autorët përgjegjës të këtij krimi mbeten ende të lirë. Drejtësia duhet të vihet në vend pa vonesa dhe justitifikime.", shkroi ministri ndërsa theksoi më tej se Shqipëria mirëpret vendimin e Prokurorisë së Kosovës, për të ngritur aktakuzë kundër të dyshuarve për organizim dhe kryerje të këtij sulmi brutal. "Llogaridhënia është element kyç për parandalimin e përshkallëzimeve dhe konsolidimin e paqes në të gjithë rajonin.", mbylli reagimin e tij kreu I diplomacisë.