Një javë pas ngjarjes tragjike dhe misterioze e vdekjes së katër turistëve rusë në një hotel në Qeret, djali i çiftit Burenkova ka tërhequr këtë të premte trupat nga morgu i Tiranës. Aleksandër Burenkova ka mbërritur në Tiranë disa ditë më parë për të tërhequr trupat e dy prindërve të tij Sergei Burenkova, 60 vjeç e Natalia Burenkova, 58 vjeçe, të motrës së tij Ekaterina Burenkova dhe të fejuarit të kësaj të fundit, Nikita Belousov. Ambasada shkruan se në mëngjesin e hershëm të 22 tetorit trupat e pajetë të shtetasve rusë, u nisën në Rusi me një fluturim të rregullt. “Sipas legjislacionit rus, mund të kryhet një ekspertizë mjeko-ligjore shtesë për të zbuluar shkaqet e vdekjes së tyre. Shpresojmë në marrjen sa më të shpejtë të përfundimeve zyrtare nga pala shqiptare, si edhe në bashkëpunimin e mëtejshëm të ngushtë të organeve ligjzbatuese ruse dhe shqiptare për sqarimin e rrethanave të tragjedisë”, thuhet në njoftimin e ambasadës ruse. Vdekja e 4 turistëve rusë në një hotel në zonën e Qerretit në kavajë është e mbuluar ende nga misteri. Trupat e tyre u gjetën të pajetë në zonën e SPA së hotelit nga punonjësja e shërbimit. Fillimisht u dyshua se mund të ishin asfiksuar nga qëndrimi gjatë në sauna, por më pas kjo pistë u rrëzua. Edhe pista tjetër se mund të kenë vdekur nga prania e lartë klorit në pishinë, nuk është mbështetur nga ekspertët. Pritet rezulatati përfundimtar I ekspertizës mjeko-ligjore që të zbardhë shkaqet e vertëta të ksaj ngjarjeje të rëndë me 4 viktima. Prokuroria e kavajës e ka regjistruar ngjarjen si vrasje pa autor.