Në Vlorë dhe Durrës për shkak të motit të keq dhe detit të dallgëzuar janë hasur probleme në lëvizjen e trageteve në dy anët e Adriatikut. Moti i përkeqësuar edhe në Vlorë ka bërë që lëvizja e mjeteve detare të pezullohet deri në një njoftim të dytë nga kapitaneria. Sipas kësaj të fundit fuqia e detit deri në këto momente ka qenë gjashtë ballë në det të hapur dhe 3-4 në gjirin e Vlorës. Mjetet e vogla detare kanë marrë njoftim që të mos lëvizin nga Triport, ndërkohë që në orët e pasdites pritet përmirësim i detit dhe tragetet e linjës Vlorë Brindisi mund te nisen drejt Italisë. Ndërkohë që gjatë natës ka pasur edhe erë të fuqishme duke dëmtuar disa pemë përgjatë Lungomares. E njëjta situatë ka qenë edhe në Durrës. Kapiteneria e portit detar bën me dije se tragetet nuk janë nisur natën e kaluar nga Durrësi drejt Barit dhe anasjelltas. Shkak është bërë forca prej 7 ballësh në det të hapur. Pranë brigjeve situata detare ka qenë më e qetë. Tragetet e linjës janë nisur vetëm mëngjesin e sotëm nga Durrësi dhe nga Bari, për të mbërritur në portet respektive pas mesditë.