Policia dhe prokuroria e Beratit kanë goditur një rast të prodhimit dhe shitjes së mandarinave me përmbajtje të lartë pesticidi. Për këtë rast është arrestuar fermeri, i cili ka kultivuar si dhe ka dërguar për shitje frutat, si dhe një person që i magazinoi dhe më pas i eksportoi ato në Kroaci dhe pas kthimit nga shteti kroat, i shiti në tregun vendas. Sakaq është arrestuar dhe një inspektor i Drejtorisë Rajonale të Veterinarisë dhe Mbrojtjes së Bimëve, i cili i dha fermerit, certifikatë fitosanitare fiktive, duke shpërdoruar në këtë mënyrë detyrën e tij. Pas hetimeve të kryera nga autoritetet ka rezultuar se fermeri ka prodhuar 10 tonë mandarina me përmbajtje të lartë pestidici dhe më pas i ka dërguar tek magazinieri. Ky i fundit i ka eksportuar drejt Krocisë, ku pas analizave kanë rezultuar me përmbajtje të lartë të pesticidit. Për këtë arsye sasia e madarinave është kthyer mbrapsht dhe është shitur në tregun shqiptar nga magazinieri. Tre të arrestuar do të përballen me akuzat e shkeljes së rregullave mbi lëndët helmuese, prodhim dhe shitjs të ushqimeve dhe lëndëve të tjera të rrezikshme për shëndetin ose jetën e njerëzve, mashtrim me produktet ushqimore dhe shpërdorim të detyrës. Operacioni i koduar “Injeksioni” u realizua nga seksioni për Hetimin e Krimit Ekonomik dhe Financiar, në bashkëpunim me Prokurorinë e Beratit.