Qeveria e El Salvadorit mbylli burgjet në të gjithë vendin dhe shpalli gjendjen e jashtëzakonshme pas 87 vrasjeve të kryera në vetëm 3 ditë. Policia e El Salvadorit tha se kishte vënë në pranga 600 të dyshuar si banditë dhe urdhëroi reduktimin e ushqimit për të burgosurit, pas një vale vrasjesh gjatë fundjavës. Presidenti Nayib Bukele shkroi se të arrestuarit nuk do të lirohen dhe urdhëroi që ushqimi për të burgosurit e bandave në burgjet e Salvadorit do të reduktohej në dy vakte në ditë. Kongresi i El Salvadorit pranoi kërkesën e Bukeles për të shpallur një gjendje të jashtëzakonshme në mesin e valës së vrasjeve. Gjendja e jashtëzakonshme heq rregullat e arrestit për deri në tridhjetë ditë, por mund të zgjatet edhe më tej. Dekreti lejon që të dyshuarit të mbahen në paraburgim pa avokat deri në 15 ditë dhe lejon policinë të kontrollojë telefonat celularë dhe mesazhet. Qeveria tha se vrasjet makabre dukeshin të lidhura me bandat famëkeqe të rrugëve të vendit, të cilat kontrollojnë efektivisht shumë lagje në kryeqytet. Policia Kombëtare raportoi se ka kapur pesë udhëheqës të Mara Salvatrucha ose MS-13, të cilët ata pretenduan se urdhëruan vrasjet e fundjavës.