E papritur ishte ndarja nga jeta e Gert Bogdanit, ish deputetit që u atashua në moshë të re në politikën shqiptare. Bogdani lindi në korrik të vitit 1980 në Tiranë, dhe përfundoi shkollën e mesme me rezultate të shkëlqyera dhe medalje ari. Rezultate të cilat i hapën rrugën për të vijuar studimet e larta në Universitetin Politeknik të Neë York-ut, ku u diplomua me nderimet më të larta. Pas rikthimit në Shqipëris, Bogdani do të themelonte dhe drejtonte rrjetin e studentëve shqiptarë në botë. Karrierën politike e filloi herët, në moshën 27 vjeçare ku kandidoi nën siglën e Partisë Demokratike për kryetar të njësisë bashkiake numër 10 në Tiranë, garë në të cilën doli fitues. Në vitin 2009, Gert Bogdani mori votëbesimin e qytetarëve shqiptarë për t’i përfaqësuar në Kuvendin e Shqipërisë dhe u bë deputeti më i ri në moshë i parlamentit. Në vitin 2011, ai u zgjodh zëvendëspresident i "Bashkimit Ndërkombëtar të të Rinjve Demokratë" e më pas, në janar të vitit 2012, nënKryetar.