Kryeministri Edi Rama po merr pjesë në Samitin e nivelit të lartë të NATO-s, që po zhvillohet në qytetin e Hagës, në Holandë. Takim që do të mbahet më 24 dhe 25 qershor. Në qendër të këtij samiti janë diskutimet për përforcimin e mbrojtjes kolektive, rritjen e shpenzimeve të përbashkëta dhe sfidat e sigurisë rajonale dhe globale. Kryeministri Rama, mësohet se do të zhvillojë një sërë takimesh. Takimin e parë ai e pati me sekretarin e përgjithshëm të NATO-s Mark Rutte, ndërsa ndau në Facebook disa detaje nga diskutimet që pati me të. “Kënaqësi të takoja Sekretarin e Përgjithshëm të NATO-s dhe mikun e çmuar, Mark Rutte, me të cilin folëm për angazhimet e Samitit, Ballkanin Perëndimor, investimin madhor për Portin e Ri të Durrësit, ku NATO do të angazhohet për terminalin ushtarak, e po ashtu edhe për përgatitjet e Samitit 2027 në Tiranë”, shkroi kreu I qeverisë.