Dy shtetas përfunduan në pranga nga policia në Tiranë dhe në Shkodër me akuzat e mashtrimit për kalim të paligjshëm të kufirit dhe trafik emigrantësh. Në Tiranë u arrestua 40 vjeçari Ahmet Bellahu, pasi dyshohet se përmes mashtrimit i ka marrë një shtetasi një shumë prej 21 mijë euro. Ai është prangosur nga efektivët e komisariatit numër 2 të kryeqytetit. 40-vjeçari është dënuar në 2024 me 6 vite burg për akuzën e mashtrimit me pasoja të rënda pasi përfitoi 21 mijë euro nga një shtetas me premtimin e rremë se do t’i siguronte dokumentacionin e nevojshëm për të udhëtuar drejt Shteteve të Bashkuara të Amerikës. Ndërkohë, në Shkodër u arrestua një 43 vjeçar, që dyshohet se kundrejt pagesës prej 400 deri në 500 euro për person ndihmonte emigrantë nga Lindja e Mesme dhe Azia që të kalonin kufirin me Malin e Zi. 43-vjeçari me banim në Mamurras u kap në flagrancë, në fshatin Vukpalaj, duke transportuar me automjet, 6 emigrantë 3 nga Siria dhe 3 nga Egjipti. Policia sekuestroi automjetin, teksa vijon hetimet nëse i arrestuari vepronte i vetëm, apo në kuadër të një grupi më të zgjeruar bashkëpunëtorësh.