Policia e Lezhës ka prangosur pronarin dhe administratorin e një lokali të vendosur në qendër të qytetit, që veç aktivitetit në shërbimin e pijeve ofronte edhe përpunimin dhe shitjen e lëndëve narkotike. Uniformat blu njoftojnë se në kuadër të operacionit ‘Shëtitorja’ është arrestuar në flagrancë shtetasi Krenar Berisha, njohur edhe me mbiemrin Shabani. Ai u ndalua pasi gjatë kontrollit të beftë të policisë u përpoq të arratisej me vrap dhe gjatë ndjekjes nga efektivët ka hedhur në lumin drin një çantë. Gjatë kontrollit në çantën që u gjet në lumë, Policia i gjeti doza me lëndë narkotike kanabis. Në vijim të operacionit, Policia gjeti dhe një çantë tjetër të fshehur në lokalin e marrë me qira nga 43-vjeçari, ku brenda saj kishte qindra doza me lëndë narkotike, gati për shitje. Operacioni ndaj tij u ndërmor pas të dhënave që policia kishte siguruar në rrugë operacionale, teksa hetimet janë përqëndruar në identifikimin e personave të tjerë të përfshirë në këtë aktivitet.