Fondi Monetar Ndërkombëtar i ka përsëritur qeverisë rekomandimin që të nisë pa vonesa të tjera zbatimin e reformës së taksës mbi pronat. Rekomandimi u ritheksua nga drejtuesja e misionit vëzhgues të FMN në Tiranë, Anke Ëeber, që paralajmëroi rreziqe të shtuara fiskale, që përfshijnë politikat sociale dhe presionin në rritje për shpenzimet e sigurisë dhe mbrojtjen në kuadër të NATO-s. FMN rekomandon rritjen e të ardhurave në buxhet duke nisur zbatimin e reformës së taksës së pronës, që në draftin e hedhur për konsultim në vitin 2023 parashikohej që të fillonte në janar të vitit 2026. Por, Ministria e Financave e shtyu me dy vite me arsyetimin se po harton një kuadër të ri ligjor që do të jetë në harmoni me Kadastrën Fiskale dhe çmimet e përditësuara të referencës që do të përfitohen pas rivlerësimit të pronave në vitin 2026. Drafti i dy viteve më parë parashikonte që për banesat taksa të ishte nga 0.1 deri në 0.2 për qind, ndërsa për ndërtimet për qëllime biznesi, qoftë bujqësor, qoftë industrial apo tregtar, taksa të ishte 0.15 deri në 0.25 për qind.