Shtrenjtohet nafta dhe benzina në vend, duke reflektuar luhatjet e bursës ndërkombëtare. Bordi i Transparencës vendosi të rrisë çmimin e tregtimit të naftës me katër lekë dhe të benzinës me tre lekë. Në pikat e karburanteve, nafta do të tregtohet me 197 lekë për litër, duke përsuar një trajektore rritëse në çmim, krahasuar me 193 lekë për litër që tregtohej më herët. Ndërkohë, në pikat e shumicës, çmimi i naftës nuk do e kapërcejë pragun e 185 lekë për litër. Çmimi tavan, i caktuar nga bordi i transparencës për benzinën është 182 lekë për litër në pikat e tregtimit me pakicë. Pra duke filluar nga kjo e shtunë, benzina do të shitet tre lekë më shumë. Ndërkohë që në pikat e shumicës çmimi i benzinës nuk do e kalojë kufirin e 170 lekë për litër. Çmimet e caktuara nga Bordi do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes. Ministria e Ekonomisë i tërheq vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi. Në rast të shkeljeve të konstatuara nga operatorë të ndryshëm do të vendoset pezullimi i aktivitetit.